Pahlawan Nu Ilang Ti Lemburna

1). Dipuseur tatar Cianjur abad 17 titimangsana.

Harita rahayat keur usum karakawihan...,tugenah.

Panundung anu kapahung laguna ayang_ayanggung , eces.....jentre ...!

Bisluit Batawi bisluit sakti. Pangjajap salira Dalem "kabale_bale kadaton".

Teu iyeuh kapireng sora anu pating gareduk tatanen kapaksa mungguh dipaksa, Jadi parepeh pelak pala reujeung cengkeh.

2) Dipuseur tatar Cianjur 1701 titimangsana.

Sajeroning jumeritna batin rahayat anu kingkin peurih kabeulit tali cameti...humandeuar

Gusti....prihatin tur nalangsa, Gusti....! bet pareng janten tumbal si jagal "Rodi kompeni"

Kelewung.....! aya sora takbir handaruan

Gantawang...! sora sinatria kedal tekad,

Allhu akbar....! Allahuakbar...! Allahuakbar...!

Kula Prawatasari !

tedak menak tatar Sunda ti puseur dayeuh Cianjur .

Mo' galideur kualatan kangjeng Dalem balema da bongan lain pireu.......,inggis ku dibendon.

Kula Prawatasari, hampura baris baha kasalira

Keur kula Prawatasari, 

haram lamun hayang dialem ku iblis nu kaniaya !

Tekad kula ketak kula, rek ngaburak kaum penjajah, 

Ngudarkeun panalikung "gawe rodi " !

3)Sapanjang wewengkon Jampang pakidulan 1702 titimangsana..

Seahna nu shalawatan awor jeung takbir pasantri

wasa nyinglarkeun gangasna siki pelor reujeung pohpor kapten Scopio.

Haleuang tembang panggupay,tinu haat R.Aria Tanujiwa.

Ptawatasari sapiriumpi,mipir hawir mapay jungkrang ngebat ngulonkeun.

Scopio manjing poho kaserdadu mamalihan

Tanujiwa nunyiliwuri ajon_ajon bela Walanda

Paingan atuh paingan boroan teu weleh ilang antukna Prawatasari dilandi ekstrimis siluman.

4) Diwewengkon Banten 1703 titimangsana.

Sabunina nu nyiliwuri teu burung kacingcirihi

Tanujiwa mulang rupa di berok jadi sakitan.

Prawatasari jeung dantrina, jadi ilang kasakten

Jujuluk ejstrimis siluman, kiwari ngan tinggal ngaran.

Wadia balad corengcang loba santri ngabubugang.ku dikepung bakung buaya mangap .

Pitapak dimana_mana,pajarmaneh sayembara

Prawatasari katut santrina, di saajenkeun reujeung piagem atawa emas jeung holden

Sok sanajan bari kadeseh,Prawatasari cadu eleh.

Diayeuh_ayeuh di sieuh_sieuh, badis keur maroro bagong

mungguh kitu polahna walanda coklar

ngagadekeun kagurmatan bangsa demi holden jeung pamuji ti kersana Gubernur Jendral.

5).Ti Sultan Agung Cirebon 1703 katompernakeun.

Aya nyaah tur hemanna kabaraya teurwuh Sunda.

dihiap pikeun nyiruruk di kedaton kacirebonan

Wadia balad anungari, ukur genep punjul hiji

Ti Banten ngebat ngetankeun nedunan gupay panghiap.

Ki Sultan kacirebonan,medarkeun parancah hirup keur Raden Prawatasari.

Ceuk paririmbon itungan lara jeung pati

ninggang kudu kebo mulih pakandangan kapuseur dayeuh Cianjur .

Raden Prawatasari cadumundur pantrang mulang

nilih bejah batan rahayat teu merdeka.

R.Prawatasari laju ngetankeun ka Bagelen bu di jugjug.

horeng di pincut ku bangsa julid nyieun pitapak ditegalan.

Di kepung ti opat madhab dihurup kudararea teu saimbang.

Trongtrangna pakarang jeung durdorna sora bedil awor jeung sora takbir sinatria anu wekasan Allaguakbar....!

Sang pahlawan amanat,

Omat tong nareangan layon kula, apan geus di cacag di walang_walang !

Omat tong nanyakeun asalna kula, pan ceuk catur kula wangkelang !

Anggur dago sukma kula,jaga rek neang sajatining kamerdekaan Allahu...aaaak..bar!

Cag.

Cianjur wanci janari 1 agustus 2021

Ku Tatang Setiadi.

Haturanan : poe kamerdekaan RI